今日想同大家分享番生桃桃既經過
桃係桃媽第一胎
隨住時間一日一日過去
最想既就係盡快卸貨
可能桃媽個肚太舒服 桃桃到40週都未有想出離既徵狀
所以就約左下星期 （即41週）入醫院進行催生
到當日，桃媽當然緊張到冇咩點訓啦
5點幾就已經醒左
沖左個涼再嘆左個早餐就同桃爸慢慢出發去醫院
桃媽對揀醫院方面主要係幾個原則
✔近
✔交通方便
✔政府醫院
what? 個個都私家生點解你要揀政府?
well...一來價錢相宜d （事後桃桃出世後發炎指數過高留院7日 埋單都係$200😂我想像唔到私院係幾多萬）
二來touchwood有咩事都係要send番政府醫院做詳細檢查
就桃媽離講 我地揀左聯合醫院
由產檢到生桃桃都係聯合
除左等得耐少少 （每次產檢大概2小時）
佢地follow up係極好❤
(桃媽做過糖尿test同陰道test 遲下再分享）
早上8點去到醫院後
想填資料 同檢查走佬袋
之後就上房等醫生檢查 （桃爸因未到探病時間就係病房外等候）
大概9點醫生巡房檢查子宮開左幾多度時
就話我可以直接落產房打催生點滴
(我以為個個都係咁 原來有人真係完全未開 要係產前房食宮頸軟化藥 touchwood食3日都冇反應就要直接開刀）
臨落產房前 護士叫我去下廁所先因為產房冇廁所
Oh...咁就見紅啦... （感覺似m come 但比較黏）
12點落到產房
檢查完就人手穿水（唔痛既 只係用支野伸入去勾穿胎膜放水）
開始種豆同打催生點滴
好好彩 我趕得切食埋個lunch先生桃桃
食完仲睇左陣電視😂
其間只有少少少少好似m到果種痛一痛
大概2點半
陣痛開始加劇到每次都要用忍受去形容
而聯合係有《笑氣》俾媽媽們聞去減痛
護士見桃媽痛到講唔到野
不停減藥 到最後已經直接拎走點滴
桃媽唔建議大家打無痛
❌除私院可以預先book 公院要等麻醉師離 分分鐘等到你生得都未到
❌麻醉成效人人唔同 未必係你所想果種
❌後遺症 包括麻醉後嘔吐，腰痛
聞笑氣有冇用呢?
點都有小小既 但桃媽覺得心理安撫比較大😂
（反正你都冇咩可以依賴 除左捉住老公不停講好痛呀唔生啦）
所以醫院冇提供既媽媽都唔駛覺得自己慘過人呀😊
到3點左右 醫生檢查已經開左7指
佢見我咁痛就問我有冇想💩既感覺 又問我試唔試下生（?）
咁緊係點都話試啦（結果當然係失敗😥）
再過多10幾分鐘
醫生話桃桃心跳變慢
要即刻生出離 唔係桃桃會有危險😱
當時已經開到9指 所以大家事不而遲 立即開始生誕
桃媽用左幾次力
但唔知點解總係搵唔岩果度力
醫生就同我解釋宜家會用吸盤幫我
最多只可以用3次 唔成功就要開刀
（因為有機會要做手術 桃爸俾人趕出產房了）
😭😭我唔想食全餐 更加唔想桃出事
產吸盆係一種助產工具
原理就係借左外間力量去幫手吸bb個頭出離
第1次 未搞清楚咩事又係錯時間用錯力
醫生同助產士鼓勵我 話已經見到桃桃頭髮
今次再用多d時間用力d推bb出離
好好彩 第2次桃桃就成功出世啦👶
桃桃係接近4點出世
桃媽產程只有唔夠4個鐘😁😁
又分享下可以加快產程既方法:
❤多走動散步
❤坐fitball
❤多行樓梯 （建議向上行就好 落去請搭lift）
❤多作深蹲 （請係懷孕後段開始）
以上幾點都係幫助盆骨放鬆同張開 亦有助bb係後期頭仔落低d
生bb真係一樣好珍貴既體驗
在此祝福各位準媽媽
《唔駛食全餐 媽寶都健康順利》
Search